ایران میں بڑی تبدیلی آنے والی ہے؟ ٹرمپ نے جنگ سے متعلق اہم بات کہہ دی

امریکی صدر ڈونلڈ ٹرمپ نے ایک ویڈیو خطاب میں ایران کے حوالے سے بڑے دعوے کیے ہیں۔ ان کا کہنا ہے کہ امریکا نے ایران کی 48 اہم شخصیات کو نشانہ بنایا ہے اور ایرانی فوجی قیادت مکمل طور پر ختم ہو چکی ہے۔ انہوں نے دعویٰ کیا کہ اب ایران میں بہت سے لوگ ہتھیار ڈالنے پر آمادہ ہیں۔

ٹرمپ کے مطابق امریکی افواج نے پاسدارانِ انقلاب کی تنصیبات اور ایران کے فضائی دفاعی نظام کو نشانہ بنایا۔ انہوں نے کہا کہ 9 بحری جہازوں اور ایرانی بحریہ کی ایک اہم عمارت پر بھی کارروائی کی گئی ہے۔

امریکی صدر نے کہا کہ اگر پاسدارانِ انقلاب، ایرانی فوج اور پولیس ہتھیار ڈال دیں تو انہیں استثنا دیا جا سکتا ہے۔ تاہم اگر وہ مزاحمت جاری رکھتے ہیں تو انہیں سخت نتائج کا سامنا کرنا پڑے گا۔

ٹرمپ نے واضح کیا کہ امریکی فوجی آپریشن اپنے اہداف کے مکمل حصول تک جاری رہے گا۔ انہوں نے یہ بھی تسلیم کیا کہ مزید امریکی جانوں کے ضیاع کا امکان موجود ہے، لیکن امریکا اپنے شہریوں کی ہلاکت کا بدلہ ضرور لے گا۔

اپنے خطاب میں امریکی صدر نے کہا کہ امریکا ایرانی عوام کے ساتھ کھڑا ہے اور ایرانی شہریوں کو چاہیے کہ وہ اس موقع سے فائدہ اٹھا کر اپنے ملک کو واپس حاصل کریں۔ ان کا کہنا تھا کہ یہ جنگ تقریباً چار ہفتے تک جاری رہ سکتی ہے کیونکہ ایران ایک بڑا اور طاقتور ملک ہے۔

ٹرمپ نے مزید بتایا کہ انہوں نے سعودی عرب، بحرین، متحدہ عرب امارات، قطر اور اردن کے رہنماؤں سے بات چیت کی ہے۔ ان کے مطابق جنگ کے بعد ایران میں جمہوریت قائم ہوگی اور حالات بہتر ہوں گے۔