سیو آور پاک
وزیرِ اعظم شہباز شریف نے کہا ہے کہ ہر پاکستانی کا اپنا گھر ہونا اس کا بنیادی حق ہے اور حکومت اس مقصد کے لیے آسان شرائط پر قرضوں کی فراہمی کو اپنی پہلی ترجیح بنا رہی ہے۔
اسلام آباد میں وزیرِ اعظم کی زیر صدارت ایک اہم اجلاس ہوا جس میں رہائشی شعبے میں سرمایہ کاری بڑھانے، کم لاگت گھروں کی فراہمی اور روزگار کے مواقع پیدا کرنے پر تفصیلی بات چیت کی گئی۔ اجلاس میں اس بات پر زور دیا گیا کہ تعمیرات کے شعبے میں بڑی گنجائش موجود ہے اور اس سے بھرپور فائدہ اٹھانے کے لیے تمام رکاوٹیں دور کی جائیں گی۔
وزیرِ اعظم نے ہدایت دی کہ بیرون ملک سرمایہ کاروں اور اوورسیز پاکستانیوں کی سرمایہ کاری کو مکمل تحفظ دیا جائے تاکہ وہ اعتماد کے ساتھ پاکستان میں سرمایہ لگا سکیں۔ ان کا کہنا تھا کہ اگر تعمیرات کے شعبے کو فروغ دیا جائے تو اس سے معیشت کو بھی سہارا ملے گا اور لاکھوں لوگوں کے لیے روزگار کے نئے مواقع پیدا ہوں گے۔
انہوں نے متعلقہ اداروں کو ہدایت دی کہ ایک واضح اور قابلِ عمل حکمت عملی تیار کی جائے جس میں پبلک اور پرائیویٹ سیکٹر کے ساتھ ساتھ صوبوں، آزاد کشمیر اور گلگت بلتستان کو بھی شامل کیا جائے تاکہ ملک بھر میں یکساں ترقی ممکن ہو سکے۔
اجلاس میں ٹاسک فورس اور مختلف ورکنگ گروپس کی تجاویز پر بریفنگ دی گئی اور اب تک کیے گئے اقدامات پر بھی روشنی ڈالی گئی۔ بریفنگ میں بتایا گیا کہ بیرون ملک سرمایہ کاروں اور اوورسیز پاکستانیوں کے لیے خصوصی سہولیات، قانونی اصلاحات اور کم لاگت گھروں کے لیے قرضوں کا نظام بہتر بنانے پر کام جاری ہے۔
مزید یہ بھی بتایا گیا کہ آئندہ مرحلے میں بینکوں کو مخصوص اہداف دیے جائیں گے جبکہ مارگیج فنانس کے مکمل نظام اور ڈویلپر لیڈ فنانسنگ کے جدید ماڈل پر بھی کام جاری ہے تاکہ لوگوں کو آسانی سے گھر بنانے کے لیے مالی مدد مل سکے۔
وزیرِ اعظم نے ہدایت دی کہ ان تمام منصوبوں کو جلد حتمی شکل دے کر ان پر فوری عملدرآمد یقینی بنایا جائے تاکہ عوام کو جلد از جلد فائدہ پہنچ سکے۔
اس اجلاس میں وفاقی وزراء، اٹارنی جنرل، اسٹیٹ بینک کے گورنر، صوبوں، گلگت بلتستان اور آزاد کشمیر کے نمائندے، نجی شعبے کے ماہرین اور دیگر اعلیٰ حکام نے شرکت کی۔
