پاکستان اور قازقستان کا بڑا فیصلہ ریلوے تعاون سے نئی تجارتی راہیں کھلنے کو تیار

اسلام آباد (09 ستمبر 2025): قازقستان کے وزیر ٹرانسپورٹ نورلان سوران بایف ایک اعلیٰ سطحی وفد کے ہمراہ وفاقی وزیر ریلوے محمد حنیف عباسی سے اسلام آباد میں ملاقات کے لیے پہنچے۔ اس ملاقات میں دونوں ممالک کے درمیان ریلوے تعاون اور خطے کی تجارتی راہداریوں کے فروغ پر تفصیلی بات چیت ہوئی۔

ملاقات کے دوران وسطی ایشیا تک ریلوے کے ذریعے رسائی کے مختلف امکانات پر غور کیا گیا۔ حکام نے اس بات پر اتفاق کیا کہ ریل رابطوں سے نہ صرف پاکستان ریلوے کو فائدہ ہوگا بلکہ ملکی معیشت کو بھی نئی تقویت ملے گی۔ وزیر ریلوے محمد حنیف عباسی نے قازقستان کے ڈپٹی وزیراعظم کے حالیہ دورۂ پاکستان کا خیرمقدم کرتے ہوئے کہا کہ دونوں ممالک علاقائی کنیکٹیویٹی کے فروغ میں گہری دلچسپی رکھتے ہیں۔

پاکستان اور قازقستان نے اس موقع پر اس بات پر زور دیا کہ ریلوے تعاون سے وسطی ایشیائی منڈیوں تک پاکستانی مصنوعات کی آسان اور تیز رسائی ممکن ہوگی۔ اس سے نہ صرف تجارتی تعلقات میں اضافہ ہوگا بلکہ خطے میں نئی اقتصادی راہیں بھی کھلیں گی۔

وزیر ریلوے نے کہا کہ ریلوے نیٹ ورک کو فروغ دے کر پاکستان پورے خطے کے لیے ایک اہم ٹرانزٹ حب بن سکتا ہے، جو ملکی برآمدات اور معیشت کے لیے ایک تاریخی سنگ میل ثابت ہوگا۔