سیو آور پاک
پاکستان نیوی نے ایک مرتبہ پھر عالمی سطح پر اہم ذمہ داری سنبھالتے ہوئے کمبائنڈ ٹاسک فورس 150 (CTF-150) کی کمان 14ویں بار حاصل کر لی ہے۔ اس حوالے سے کمان کی تبدیلی کی باضابطہ تقریب بحرین میں واقع کمبائنڈ میری ٹائم فورسز (CMF) کے ہیڈکوارٹر میں منعقد ہوئی۔
آئی ایس پی آر کے مطابق اس تقریب میں پاکستان نیوی کے کموڈور محمد یاسر نے کمبائنڈ ٹاسک فورس 150 کی کمان رائل سعودی نیول فورسز کے کموڈور فہد ایس الجواید سے وصول کی۔ سی ٹی ایف 150 کی قیادت سنبھالنا عالمی بحری سلامتی کے شعبے میں پاکستان نیوی کے مؤثر اور ذمہ دار کردار کی عکاسی کرتا ہے۔
کمان سنبھالنے کے بعد گفتگو کرتے ہوئے کموڈور محمد یاسر نے کہا کہ ان کی ٹیم ہر قسم کے چیلنجز سے نمٹنے کے لیے مکمل طور پر تیار ہے۔ انہوں نے خطے میں بحری سلامتی کو یقینی بنانے اور غیر قانونی بحری سرگرمیوں کے خلاف مؤثر اقدامات جاری رکھنے کے عزم کا اظہار کیا۔
کموڈور محمد یاسر کا کہنا تھا کہ پاکستان نیوی خطے میں امن، استحکام اور بحری مواصلاتی راستوں کے تحفظ کے لیے اپنا کردار پوری ذمہ داری سے ادا کرتی رہے گی۔ انہوں نے اہم سمندری راستوں کی سکیورٹی کو یقینی بنانے کے پاکستان نیوی کے پختہ عزم کو بھی دہرایا۔
آئی ایس پی آر کے مطابق کمبائنڈ ٹاسک فورس 150، کمبائنڈ میری ٹائم فورسز کے تحت کام کرنے والی پانچ ٹاسک فورسز میں سے ایک ہے۔ اس فورس کا بنیادی مشن بحرِ ہند، بحیرۂ عرب اور خلیجِ عمان میں اسلحے اور منشیات کی اسمگلنگ میں ملوث عناصر کی روک تھام اور ان کے نیٹ ورکس کو ناکام بنانا ہے۔
آئی ایس پی آر کا مزید کہنا ہے کہ رائل سعودی نیول فورسز کی کمان میں پاکستان نیوی کے جہازوں کی جانب سے کی جانے والی انسدادِ منشیات کارروائیاں پاکستان نیوی کے عزم اور پیشہ ورانہ صلاحیتوں کا واضح ثبوت ہیں۔ یہ کارروائیاں باہمی بحری تعاون کے ذریعے خطے میں امن و سلامتی کے قیام کے لیے پاکستان نیوی کی مضبوط وابستگی کو ظاہر کرتی ہیں۔
کمان کی تبدیلی کی تقریب میں بحرین میں تعینات پاکستان کے سفیر نے بھی شرکت کی۔ اس موقع پر کمانڈر کمبائنڈ میری ٹائم فورس، کمانڈر رائل بحرینی نیول فورسز اور سی ایم ایف کے تحت کام کرنے والی مختلف بحری افواج کے نمائندے بھی موجود تھے۔
