سیو آور پاک
معروف پاکستانی اداکارہ ثناء عسکری نے حال ہی میں ایک دلچسپ انکشاف کیا ہے۔ ان کا کہنا ہے کہ ان کے شوہر منہاج علی عسکری کے ہارر کانٹینٹ کی وجہ سے ان کے گھر کا ماحول کبھی کبھار ایسا لگنے لگتا ہے جیسے وہاں جنات کا ماحول بن گیا ہو۔
ثناء عسکری ایک نجی ٹی وی چینل کی رمضان نشریات میں بطور مہمان شریک ہوئیں جہاں انہوں نے مختلف موضوعات پر گفتگو کی۔ اسی دوران انہوں نے اپنی ذاتی زندگی سے جڑا ایک دلچسپ واقعہ بھی سنایا۔
اداکارہ نے بتایا کہ ان کے شوہر منہاج علی عسکری کو خوفناک کہانیوں اور ہارر کانٹینٹ میں خاص دلچسپی ہے۔ وہ ان دنوں ڈراموں میں کم نظر آتے ہیں اور زیادہ تر اپنی توجہ یوٹیوب کے لیے ویڈیوز بنانے پر دے رہے ہیں۔ اس مقصد کے لیے انہوں نے گھر کے اندر ہی ایک چھوٹا سا اسٹوڈیو بنا رکھا ہے جہاں وہ ڈراؤنی کہانیاں ریکارڈ کرتے ہیں۔
ثناء عسکری کے مطابق اب ان کا بیٹا بھی آہستہ آہستہ بڑا ہو رہا ہے اور کبھی کبھار اپنے والد کے کام میں شامل ہو جاتا ہے۔ بعض اوقات دونوں مل کر انہیں مذاق میں ڈرا بھی دیتے ہیں۔
اداکارہ نے ایک دلچسپ واقعہ بتاتے ہوئے کہا کہ چند ماہ پہلے انہیں ایسا محسوس ہوا جیسے گھر کے اندر کسی نے انہیں منہاج کی آواز میں پکارا ہو، حالانکہ اس وقت منہاج وہاں موجود نہیں تھے۔ اس واقعے کے بعد انہوں نے اپنے شوہر سے کہا کہ وہ ہارر کانٹینٹ کچھ کم کر دیں۔
انہوں نے ہنستے ہوئے کہا کہ مسلسل خوفناک کہانیاں سننے اور اسی ماحول میں کام کرنے کی وجہ سے گھر کا ماحول کچھ ایسا بن گیا ہے جیسے وہاں جنات کے لیے دوستانہ فضا بن گئی ہو۔
