سیو آور پاک
اسلام آباد: پاکستان اور عراق کے دیرینہ اور تاریخی تعلقات میں ایک نیا باب کھل گیا ہے۔ آئی ایس پی آر کے مطابق پاک فضائیہ کے سربراہ ایئر چیف مارشل ظہیر احمد بابر نے عراقی فضائیہ کے ساتھ تعاون کو مزید وسعت دینے کا اعلان کیا۔ اس موقع پر انہوں نے کہا کہ پاکستان، عراقی فضائیہ کی استعداد کار بڑھانے اور جدید تربیتی نظام کی تشکیل میں بھرپور تعاون کرے گا۔
تفصیلات کے مطابق ملاقات کے دوران دونوں ملکوں کے فضائیہ کے سربراہان نے مشترکہ مشقیں، تربیتی اقدامات اور ٹیکنالوجی کے تبادلے پر اتفاق کیا۔ ایئر چیف نے واضح کیا کہ پاک فضائیہ، عراقی فضائیہ کو ہر ممکن تربیتی سہولت اور تکنیکی معاونت فراہم کرے گی تاکہ خطے میں دفاعی تعاون مزید مضبوط ہو۔
عراقی کمانڈر نے پاک فضائیہ کی پیشہ ورانہ صلاحیتوں اور تکنیکی ترقی کی کھل کر تعریف کی اور کہا کہ پاکستان نے ہمیشہ برادر ممالک کو دفاعی تربیت میں تعاون دیا ہے۔ ان کا کہنا تھا کہ عراق، پاکستان کے تجربے سے فائدہ اٹھا کر اپنی فضائیہ کو جدید خطوط پر استوار کرنا چاہتا ہے۔
آئی ایس پی آر کے مطابق عراقی وفد نے نیشنل ایرو اسپیس سائنس اینڈ ٹیکنالوجی پارک کا دورہ بھی کیا اور نیشنل آئی ایس آر، انٹیگریٹڈ ایئر آپریشنز سینٹر اور سائبر کمانڈ پر تفصیلی بریفنگ لی۔ اس موقع پر دونوں ممالک کے درمیان تعاون بڑھانے کے نئے طریقۂ کار پر بھی غور کیا گیا۔
ایئر چیف مارشل ظہیر احمد بابر نے زور دیا کہ پاک فضائیہ عراقی فضائیہ کی استعداد کار بڑھانے اور جدید تربیتی نظام میں بھرپور مدد فراہم کرنے کے لیے پرعزم ہے، تاکہ دونوں ممالک خطے میں دفاعی تعاون کی نئی مثال قائم کر سکیں۔
