سیو آور پاک
قطر: عرب اسلامی ممالک کے ہنگامی سربراہی اجلاس کے دوران وزیراعظم پاکستان شہباز شریف نے عالمی رہنماؤں سے ایک سلسلہ وار اہم ملاقاتیں کیں۔ اس اجلاس میں مسلم دنیا کے بڑے بڑے رہنما شریک ہوئے، جن میں ترکیہ کے صدر رجب طیب ایردوان اور سعودی عرب کے ولی عہد شہزادہ محمد بن سلمان بن عبدالعزیز آل سعود شامل ہیں۔
ذرائع کے مطابق وزیراعظم شہباز شریف نے فلسطین کے صدر محمود عباس، امیرِ قطر شیخ تمیم بن حمد آل ثانی، تاجکستان اور مصر کے صدور سے بھی الگ الگ ملاقاتیں کیں۔ ان ملاقاتوں میں خطے کی موجودہ صورتِ حال اور مسلم ممالک کے مشترکہ اقدامات پر تبادلۂ خیال کیا گیا۔
وزیراعظم شہباز شریف نے عالمی رہنماؤں سے پرتپاک انداز میں ملاقات کی اور فلسطین کے صدر محمود عباس سے باہمی احترام کے طور پر بغل گیر ہو کر خیرسگالی کا اظہار کیا۔
یہ ہنگامی سربراہی اجلاس اسرائیل کے قطر پر حملے کی مذمت اور اس کے خطے پر پڑنے والے اثرات کے بارے میں تفصیلی بات چیت کے لیے طلب کیا گیا تھا۔ اجلاس میں 50 سے زائد اسلامی ممالک کے سربراہان شریک ہیں اور مختلف ممالک کی اعلیٰ قیادت اس موقع پر مستقبل کے مشترکہ لائحہ عمل پر مشاورت کر رہی ہے۔
