سیو آور پاک
لاہور: وزیراعلیٰ پنجاب مریم نواز نے لاہور کے علاقے چوہنگ میں قائم فلڈ ریلیف کیمپ کا دورہ کیا، جہاں انہوں نے سیلاب متاثرین کے حالات کا جائزہ لیا۔ اس موقع پر وہ ایک عارضی کلاس روم میں بھی گئیں اور بچوں سے دوستانہ انداز میں گفتگو کی۔
مریم نواز نے ریلیف کیمپ میں موجود فیلڈ ہسپتال اور میڈیکل کیمپ کا بھی تفصیلی دورہ کیا۔ وہاں موجود ڈاکٹروں اور عملے نے انہیں سیلاب متاثرہ شہریوں کو فراہم کی جانے والی طبی سہولیات پر بریفنگ دی۔ وزیراعلیٰ نے متاثرین کی صحت، رہائش اور خوراک کے انتظامات کا خود معائنہ کیا اور ہدایات دیں کہ کسی قسم کی کمی نہ چھوڑی جائے۔
دورے کے دوران وزیر اطلاعات عظمیٰ بخاری، وزیر صحت خواجہ سلمان رفیق اور خواجہ عمران نذیر بھی وزیراعلیٰ کے ہمراہ تھے۔ مریم نواز نے کہا کہ حکومت متاثرین کو ہر ممکن ریلیف فراہم کرنے کے لیے دن رات کام کر رہی ہے اور متاثرہ خاندانوں کو اکیلا نہیں چھوڑا جائے گا۔
