سیو آور پاک
راولپنڈی: طالبہ سے زیادتی کرنے والا اکیڈمی کا پرنسپل آخرکار قانون کی گرفت میں آ گیا۔ پولیس نے فوری کارروائی کرتے ہوئے ملزم کو گرفتار کر لیا جبکہ متاثرہ خاتون کا میڈیکل پراسیس بھی شروع کر دیا گیا ہے۔
پولیس رپورٹ کے مطابق متاثرہ خاتون نے مقدمہ درج کراتے ہوئے الزام لگایا کہ پرنسپل نے اسے شادی کا جھانسہ دے کر زیادتی کا نشانہ بنایا۔ شکایت درج ہوتے ہی پیرودھائی پولیس حرکت میں آئی اور چند گھنٹوں میں ملزم کو حراست میں لے لیا۔
ذرائع کے مطابق تفتیشی ٹیم نے متاثرہ طالبہ کے بیان اور دیگر شواہد کی روشنی میں مقدمہ آگے بڑھایا۔ پولیس کا کہنا ہے کہ ملزم کے خلاف ٹھوس ثبوت موجود ہیں، جنہیں عدالت میں پیش کیا جائے گا تاکہ اسے قرار واقعی سزا دلائی جا سکے۔
ادھر متاثرہ خاتون کا میڈیکل ٹیسٹ شروع کر دیا گیا ہے تاکہ قانونی کارروائی کو مزید مضبوط بنایا جا سکے۔ پولیس حکام نے واضح کیا ہے کہ اس معاملے میں کسی قسم کی رعایت نہیں برتی جائے گی اور انصاف ہر صورت میں فراہم کیا جائے گا۔
