سیو آور پاک
اسلام آباد: یومِ بحریہ کے موقع پر وزیراعظم محمد شہباز شریف نے اپنے خصوصی پیغام میں کہا ہے کہ وہ پاک بحریہ کے تمام جوانوں، افسران اور اہلکاروں کو خراجِ تحسین پیش کرتے ہیں جنہوں نے ہمیشہ اپنے عزم اور بہادری سے قوم کا سر بلند کیا۔
وزیراعظم نے کہا کہ آج کا دن ہمیں نہ صرف بحریہ کی تابناک تاریخ یاد دلاتا ہے بلکہ اس عزم کی تجدید کا موقع بھی فراہم کرتا ہے کہ پاکستان اپنی سمندری حدود اور آبی وسائل کی حفاظت میں کبھی سمجھوتہ نہیں کرے گا۔
انہوں نے 1965 کی جنگ میں ہونے والے تاریخی آپریشن سومناتھ کا ذکر کرتے ہوئے کہا کہ یہ معرکہ پاک بحریہ کی بہادری اور پیشہ ورانہ مہارت کی روشن مثال ہے، جس نے دشمن کے شہر دوارکا پر فیصلہ کن کارروائی کرتے ہوئے اس کا مواصلاتی نظام مفلوج کر دیا تھا۔ وزیراعظم کے مطابق یہ کامیابی آج بھی بحریہ کے جوانوں کے جذبۂ قربانی کو تازہ کر دیتی ہے۔
شہباز شریف نے مزید کہا کہ 1965 کے بعد بھی بحیرۂ عرب میں طاقت کے توازن کو برقرار رکھنے میں پاک بحریہ نے مرکزی کردار ادا کیا ہے۔ حالیہ کامیابیاں اس بات کا واضح ثبوت ہیں کہ پاکستان اپنی آبی سرحدوں کا دفاع ہر قیمت پر کرنے کی صلاحیت رکھتا ہے۔
انہوں نے زور دیا کہ پاک بحریہ نہ صرف جنگی محاذ پر بلکہ ملک کی آبی معیشت (Blue Economy)، بندرگاہوں کی ترقی اور ساحلی کمیونٹی کی فلاح و بہبود میں بھی اہم کردار ادا کر رہی ہے۔ بین الاقوامی مشقوں میں حصہ لینا، آفات میں امدادی سرگرمیاں اور سمندری ذرائع آمدورفت کے تحفظ جیسے اقدامات نے دنیا میں پاکستان کے وقار کو مزید بڑھایا ہے۔
پیغام کے آخر میں وزیراعظم نے کہا:
"یومِ بحریہ کے موقع پر ہم اپنے ماضی اور حال کے ہیروز کو سلام پیش کرتے ہیں۔ اللہ تعالیٰ پاک بحریہ، مسلح افواج اور پاکستان کو ہمیشہ کامیابی اور خوشحالی عطا فرمائے۔”
انہوں نے نعرہ بلند کیا:
پاک بحریہ زندہ باد! پاکستان پائندہ باد!
