سیو آور پاک
اسلام آباد: ترکیہ کے وزیر قومی دفاع یاشر گلر نے 8 تا 10 ستمبر پاکستان کا تین روزہ اہم دورہ کیا۔ اس دورے کا مقصد پاکستان اور ترکیہ کے درمیان تعاون کو نئی بلندیوں پر لے جانا اور مشترکہ وزارتی کمیشن کے 16ویں اجلاس کی قیادت کرنا تھا۔
دورے کے دوران یاشر گلر نے وزیر اعظم شہباز شریف، وزیر دفاع خواجہ محمد آصف اور فیلڈ مارشل سید عاصم منیر سے الگ الگ ملاقاتیں کیں۔ ان ملاقاتوں میں دونوں ممالک نے اس عزم کا اظہار کیا کہ برادرانہ تعلقات کو مزید مضبوط کیا جائے گا اور تجارت، سرمایہ کاری، تحقیق، آئی ٹی، زراعت، توانائی، تعلیم اور ثقافتی تبادلوں سمیت تمام شعبوں میں شراکت داری بڑھائی جائے گی۔
وزیر اعظم شہباز شریف نے ترک وزیر دفاع کے ساتھ ملاقات میں کہا کہ پاکستان اور ترکیہ کے درمیان اقتصادی تعلقات کے ساتھ ساتھ آئی ٹی، زراعت، تعلیم اور توانائی میں بھی مشترکہ منصوبوں پر کام کی ضرورت ہے تاکہ دونوں ملکوں کے عوام کو براہ راست فائدہ پہنچ سکے۔
ترک وزیر دفاع اور پاکستانی عسکری و دفاعی قیادت کی ملاقاتوں میں دونوں ممالک نے اسٹریٹجک اور دفاعی تعاون کو مزید گہرا کرنے پر اتفاق کیا۔ ان ملاقاتوں کے نتیجے میں کئی نئے شعبوں میں اشتراکِ عمل کی راہیں کھلنے کا امکان ہے۔
16ویں مشترکہ وزارتی کمیشن کی صدارت پاکستان کے وفاقی وزیر تجارت جام کمال خان اور ترکیہ کے وزیر دفاع یاشر گلر نے مشترکہ طور پر کی۔ اجلاس میں اعلیٰ سطح اسٹریٹجک تعاون کونسل (HLSCC) کے ایجنڈے پر پیش رفت کا تفصیلی جائزہ لیا گیا اور تجارت، سرمایہ کاری، دواسازی، انفارمیشن ٹیکنالوجی، ای کامرس، توانائی، تعلیم، کان کنی، زراعت، میڈیا اور سیاحت سمیت مختلف شعبوں میں تعاون کے فروغ پر زور دیا گیا۔
یہ دورہ پاکستان اور ترکیہ کو اپنے دیرینہ برادرانہ تعلقات کو کثیرالجہتی شراکت داری میں تبدیل کرنے کے لیے ایک اہم سنگ میل قرار دیا جا رہا ہے۔ دونوں ممالک اس بات پر متفق ہیں کہ مستقبل میں دوطرفہ تعلقات کو عملی شکل دینے کے لیے مزید مشترکہ اقدامات کیے جائیں گے۔
