سیو آور پاک
گوجرانوالہ میں میڈیا سے گفتگو کرتے ہوئے گورنر پنجاب سردار سلیم حیدر نے کہا کہ حالیہ سیلاب سے متاثرہ خاندان مشکل میں ہیں اور ان کی فوری مدد کرنا حکومتِ پنجاب کی اولین ذمہ داری ہے۔ انہوں نے واضح کیا کہ ریلیف کے معاملے پر سیاست کی بجائے عوام کو ریلیف فراہم کرنا سب کا مقصد ہونا چاہیے۔
ان کے مطابق بے نظیر انکم سپورٹ پروگرام کے ذریعے فوری امداد دی جا سکتی ہے اور اگر وزیرِاعلیٰ متاثرین کو دس لاکھ روپے دینا چاہتی ہیں تو یہ ایک خوش آئند اقدام ہے۔ گورنر پنجاب کا کہنا تھا کہ اگر متاثرہ افراد کو دس کی بجائے بیس لاکھ روپے بھی دئیے جائیں تو یہ کم ہیں کیونکہ ان کے گھروں اور مویشیوں کا نقصان بہت بڑا ہے۔
انہوں نے مزید کہا کہ پیپلز پارٹی اور ن لیگ دونوں عوام کے مسائل کا حل چاہتی ہیں اور یہ ایک مثبت پیشرفت ہے۔ گورنر پنجاب نے وزیراعظم میاں شہباز شریف اور آرمی چیف سید عاصم منیر کے ساتھ امریکی صدر کی ملاقات کو پاکستان کیلئے عزت کی بات قرار دیا۔ ان کے مطابق یہ ملاقات پاکستان اور امریکہ کے تعلقات کو برابری کی سطح پر مضبوط کرنے میں اہم کردار ادا کرے گی اور اس کے مثبت اثرات جلد سامنے آئیں گے۔
انہوں نے چین کے ساتھ پاکستان کے تعلقات کو بھائی چارے کا رشتہ قرار دیتے ہوئے کہا کہ پوری قوم خوش ہے اور فخر سے سر بلند ہے۔ گورنر پنجاب نے پاک بھارت ایشیا کپ میچ کے حوالے سے کہا کہ پاکستانی ٹیم کیلئے کامیابی کی دعا گو ہیں۔ ان کے مطابق قوم جذباتی ضرور ہے لیکن کھیل کو کھیل کی حد تک ہی رکھنا چاہیے۔
