سیو آور پاک
ریاض (نمائندہ خصوصی) : پاکستان آرمی کے چیف آف جنرل اسٹاف لیفٹیننٹ جنرل سید عامر رضا نے ریاض میں سعودی عرب کی مسلح افواج کے چیف آف جنرل اسٹاف جنرل فایاض بن حمید الرویلی سے اہم ملاقات کی، جس میں دونوں ممالک کے درمیان دفاعی تعاون کو مزید مضبوط بنانے پر تفصیلی گفتگو ہوئی۔
ملاقات کے دوران اسٹریٹجک مفادات، دوطرفہ عسکری تعاون، مشترکہ آپریشنز کی استعداد اور اسٹریٹجک میوچوئل ڈیفنس ایگریمنٹ (SMDA) کے تحت تعاون بڑھانے پر خصوصی توجہ دی گئی۔ دونوں ممالک نے اس بات پر اتفاق کیا کہ مستقبل میں دفاعی شراکت داری کو جدید خطوط پر استوار کیا جائے گا۔
آئی ایس پی آر کے مطابق دونوں فوجی قیادتوں نے پاکستان اور سعودی عرب کے درمیان دیرینہ برادرانہ تعلقات کو مزید گہرا کرنے کے عزم کا اعادہ کیا، اور کہا کہ دونوں ممالک کی شراکت خطے کے امن، استحکام اور خود انحصاری میں اہم کردار ادا کرے گی۔
ریاض میں پاکستان–سعودی عرب دوطرفہ دفاعی انڈسٹریل فورم کا خصوصی اجلاس بھی منعقد ہوا، جس کی قیادت پاکستان کی جانب سے لیفٹیننٹ جنرل سید عامر رضا جبکہ سعودی وفد کی سربراہی خالد البیاری، اسسٹنٹ وزیرِ دفاع برائے ایگزیکٹو افیئرز، نے کی۔
فورم میں جاری دفاعی منصوبوں کا جائزہ لیا گیا اور جدید ٹیکنالوجیز، مشترکہ صنعتی منصوبوں اور دفاعی پیداوار کے نئے دروازے کھولنے پر اتفاق کیا گیا، جو سعودی عرب کے ویژن 2030 کے مطابق ہے۔
لیفٹیننٹ جنرل سید عامر رضا نے سعودی افواج کی استعداد بڑھانے کے لیے پاکستان کی مسلسل مدد کے عزم کا اظہار کیا۔ سعودی قیادت نے دہشت گردی کے خلاف پاکستان کی قربانیوں اور خطے کے امن کے لیے اس کی کوششوں کو سراہا۔
