سیو آور پاک
قومی اسمبلی کے اجلاس میں وفاقی وزیر اطلاعات عطاء اللہ تارڑ نے خطاب کرتے ہوئے اپوزیشن، خاص طور پر پی ٹی آئی، کے رویے پر کھل کر بات کی۔
عطاء اللہ تارڑ نے کہا کہ وزیراعظم محمد شہباز شریف نے پہلے دن سے میثاقِ جمہوریت کی دعوت دی، لیکن اس کے باوجود پی ٹی آئی نے ضمنی انتخابات کا بائیکاٹ کرنے کا اعلان کر دیا۔ ان کے مطابق جو لوگ خود الیکشن میں حصہ نہیں لیتے، انہیں بعد میں تنقید کرنے کا کوئی اخلاقی حق نہیں رہتا۔
انہوں نے دھاندلی کے الزامات لگانے والوں سے سخت سوال کیا کہ اگر واقعی دھاندلی ہوئی ہے تو وہ ثبوت کہاں ہیں؟ ٹربیونل میں پیش کرنے کے لیے کتنے کیس تیار کیے گئے ہیں؟ وزیر اطلاعات نے کہا کہ جب عدالتیں ان سے شواہد مانگتی ہیں تو یہ لوگ صرف تاریخیں لینے کی کوشش کرتے ہیں۔
عطاء اللہ تارڑ نے مثال دیتے ہوئے کہا کہ بابر نواز خان نے پی ٹی آئی سے ایک اہم نشست واپس لے لی، جو اس بات کا ثبوت ہے کہ میدان میں آنے والے ہی اصل مقابلہ کرتے ہیں۔
انہوں نے کہا کہ الیکشن کے دوران پی ٹی آئی کا طرزِ عمل سب کے سامنے ہے، اور حکومت نے کئی بار اپوزیشن کو مذاکرات کی پیشکش بھی کی، لیکن جواب ہمیشہ ضد اور الزام تراشی کی صورت میں ملا۔
وزیر اطلاعات کے مطابق اپنی سیاسی غلطیوں کو چھپانے کے لیے حکومت پر الزامات لگانا مناسب طرزِ سیاست نہیں۔ انہوں نے کہا کہ پی ٹی آئی کی ہر بات اور ہر عمل میں تضاد واضح ہے۔ ان کے سوشل میڈیا اکاؤنٹس اداروں کے خلاف مہم چلاتے ہیں، جو قابل مذمت ہے۔
عطاء اللہ تارڑ نے زور دیا کہ سیاسی استحکام صرف اسی وقت ممکن ہے جب اپوزیشن ذمہ داری کا مظاہرہ کرے اور بے بنیاد مہمات چلانے کے بجائے پارلیمانی روایات کو اپنائے۔
