سیو آور پاک
جاپان کے شمالی حصے میں آج ایک بار پھر شدید زلزلے نے لوگوں کو خوفزدہ کر دیا۔ 7.5 شدت کے اس جھٹکے کے نتیجے میں کم از کم 23 افراد زخمی ہوئے ہیں، جبکہ کئی عمارتوں کو ہاچینوہے کے علاقے میں جزوی نقصان پہنچا ہے۔
ٹوکیو سے ملنے والی معلومات کے مطابق جاپانی حکام صورتحال کا مکمل جائزہ لے رہے ہیں اور ابتدائی نقصانات کی تفصیلات جمع کی جا رہی ہیں۔ حکومتی اداروں نے ریسکیو ٹیموں کو متاثرہ علاقوں میں الرٹ کر دیا ہے۔
قابلِ ذکر بات یہ ہے کہ گزشتہ روز بھی جاپان کے شمال مشرقی علاقوں میں ایک اور طاقتور زلزلہ آیا تھا، جس کی شدت 7.6 ریکارڈ کی گئی تھی۔ اس جھٹکے کے بعد جاپانی موسمیاتی ایجنسی نے ساحلی علاقوں میں دس فٹ تک بلند سونامی لہروں کی وارننگ بھی جاری کی تھی۔
امریکی جیولوجیکل سروے کے مطابق گزشتہ روز آنے والے زلزلے کا وقت مقامی گھڑی کے مطابق رات 11 بج کر 15 منٹ تھا۔ اس کا مرکز ساحل سے تقریباً 70 کلومیٹر دور اور زیرِ زمین تقریباً 33 میل گہرائی میں واقع تھا۔
جاپانی انتظامیہ کسی بھی ممکنہ آفٹر شاکس کے پیشِ نظر عوام کو محتاط رہنے کی ہدایت کر رہی ہے۔
