سیو آور پاک
اچھرہ جیولری مارکیٹ سے کروڑوں روپے مالیت کے سونے کے غبن کے کیس میں ایک اور اہم پیشرفت سامنے آ گئی ہے۔ مرکزی ملزم وسیم اختر کے خلاف اس کی سوتیلی والدہ کی مدعیت میں بھی مقدمہ درج کر لیا گیا ہے۔
مدعیہ کے مطابق انہوں نے وسیم اختر کے پاس ڈھائی کلوگرام سے زائد سونا امانت کے طور پر رکھوایا تھا، جس کی مالیت سات کروڑ بیالیس لاکھ روپے سے زیادہ بنتی ہے۔ تاہم ملزم نے امانت میں دیا گیا سونا واپس نہیں کیا۔
پولیس کا کہنا ہے کہ اچھرہ تھانے میں سونا غائب ہونے کے واقعات پر اب تک سات مختلف مقدمات درج ہو چکے ہیں۔ اس کے باوجود نامزد ملزم وسیم اختر تاحال پولیس کی گرفت میں نہیں آ سکا۔
پولیس حکام کے مطابق ملزم کی مکمل ٹریول ہسٹری حاصل کر لی گئی ہے اور یقین دہانی کرائی گئی ہے کہ وسیم اختر کو جلد گرفتار کر لیا جائے گا۔ پولیس کا کہنا ہے کہ کیس کی تحقیقات جاری ہیں اور تمام پہلوؤں سے معاملے کو دیکھا جا رہا ہے۔
