سیو آور پاک
پاکستانی فوج کے فیلڈ مارشل سید عاصم منیر کو سعودی عرب کے اعلیٰ ترین سرکاری اعزاز کنگ عبدالعزیز میڈل سے نواز دیا گیا ہے، جو دونوں ممالک کے مضبوط تعلقات کی ایک اہم مثال ہے۔
انٹر سروسز پبلک ریلیشنز (آئی ایس پی آر) کے مطابق فیلڈ مارشل سید عاصم منیر نے حال ہی میں سعودی عرب کا سرکاری دورہ کیا۔ اس دوران انہوں نے سعودی وزیرِ دفاع شہزادہ خالد بن سلمان سے ملاقات کی، جس میں باہمی دلچسپی کے اہم امور پر تفصیلی بات چیت ہوئی۔
آئی ایس پی آر کے مطابق ملاقات میں خطے کی مجموعی سلامتی کی صورتحال، دفاعی تعاون اور عسکری روابط کو مزید مضبوط بنانے کے پہلوؤں پر غور کیا گیا۔ دونوں فریقین نے اسٹریٹجک شراکت داری اور بدلتے ہوئے جیو اسٹریٹجک چیلنجز پر بھی تبادلہ خیال کیا۔
شاہی اعزاز دینے کی تقریب کے دوران پاک–سعودی تعلقات کو مزید فروغ دینے اور مستقبل میں تعاون کو وسعت دینے کے عزم کا بھی اظہار کیا گیا۔ یہ اعزاز پاکستان اور سعودی عرب کے درمیان دیرینہ برادرانہ تعلقات اور باہمی اعتماد کی عکاسی کرتا ہے۔
