سیو آور پاک
وفاقی وزیر اطلاعات عطا اللہ تارڑ نے کہا ہے کہ پاکستان کی مؤثر خارجہ پالیسی کے باعث ملک کو دنیا بھر میں عزت اور پذیرائی حاصل ہو رہی ہے۔ ان کے مطابق حالیہ غزہ بورڈ آف پیس اجلاس میں وزیراعظم شہباز شریف نے فلسطینی عوام کا مقدمہ مضبوط انداز میں پیش کیا۔
عطا اللہ تارڑ نے بتایا کہ اس اجلاس میں پاکستان کے مؤقف کو کافی سراہا گیا۔ انہوں نے کہا کہ امریکی صدر ڈونلڈ ٹرمپ نے بھی پاکستان کے کردار کی تعریف کی، جو کہ ملک کے لیے باعث فخر ہے۔ وزیر اطلاعات کے مطابق صدر ٹرمپ نے وزیراعظم اور فیلڈ مارشل کے کردار کو بھی مثبت انداز میں سراہا۔
انہوں نے مزید کہا کہ پاکستان اب عالمی سطح پر ایک اہم ملک کے طور پر ابھر کر سامنے آ رہا ہے۔ ان کے بقول یہ سب کامیاب خارجہ پالیسی کا نتیجہ ہے کہ آج دنیا پاکستان کو سنجیدگی سے سن رہی ہے۔ وزیراعظم نے فلسطینیوں کے حق میں واضح اور مضبوط آواز اٹھائی اور آزاد فلسطینی ریاست کے قیام کو خطے میں امن کے لیے ضروری قرار دیا۔
وزیر اطلاعات کا کہنا تھا کہ ماضی میں پاکستان کو عالمی تنہائی کا سامنا تھا، لیکن اب صورتحال بدل چکی ہے۔ آج پاکستان ہر اہم عالمی معاملے میں اپنا کردار ادا کر رہا ہے۔ انہوں نے کہا کہ جب قیادت مخلص اور دیانت دار ہو تو اس کے اثرات مثبت ہی سامنے آتے ہیں۔
انہوں نے مزید بتایا کہ وزیراعظم شہباز شریف اور امریکی صدر کے درمیان ملاقات خوشگوار ماحول میں ہوئی، جس سے دونوں ممالک کے تعلقات مزید بہتر ہونے کی امید ہے۔
