سیو آور پاک
امریکہ کے صدر ڈونلڈ ٹرمپ نے ایران کو سخت الفاظ میں خبردار کرتے ہوئے کہا ہے کہ اگر قطر کو دوبارہ نشانہ بنایا گیا تو امریکہ ایران کی اہم گیس فیلڈ کو تباہ کر سکتا ہے۔
سوشل میڈیا پلیٹ فارم ٹروتھ سوشل پر اپنے بیان میں صدر ٹرمپ نے کہا کہ اسرائیل کے حالیہ حملے کے بارے میں امریکہ کو پہلے سے کوئی معلومات نہیں تھیں۔ انہوں نے بتایا کہ اسرائیل نے غصے میں ایک محدود کارروائی کی، جس میں بڑے علاقے کے بجائے صرف ایک چھوٹے حصے کو نشانہ بنایا گیا۔ ان کے مطابق ایران کو بھی اس حملے کی پیشگی خبر نہیں تھی۔
صدر ٹرمپ نے ایران کی جانب سے قطر کے علاقے راس لفان میں ایل این جی گیس تنصیبات پر کیے گئے حملے کو بلا جواز اور غیر منصفانہ قرار دیا۔ انہوں نے کہا کہ اس قسم کے اقدامات سے خطے میں کشیدگی مزید بڑھ سکتی ہے اور حالات خراب ہو سکتے ہیں۔
انہوں نے ایران کے ساؤتھ پارس گیس فیلڈ کو نہایت اہم قرار دیتے ہوئے کہا کہ اسرائیل دوبارہ اس پر حملہ نہیں کرے گا۔ تاہم انہوں نے واضح کیا کہ اگر ایران نے دوبارہ قطر کو نشانہ بنایا تو امریکہ اس گیس فیلڈ کو شدید نقصان پہنچا سکتا ہے اور اسے مکمل طور پر تباہ کرنے کی صلاحیت رکھتا ہے۔
صدر ٹرمپ کا کہنا تھا کہ اگر امریکہ کو کارروائی کرنا پڑی تو وہ بہت طاقتور ہوگی، ایسی طاقت جسے ایران نے پہلے کبھی نہیں دیکھا ہوگا۔ تاہم انہوں نے یہ بھی کہا کہ وہ خطے میں مزید تباہی اور تشدد نہیں چاہتے، کیونکہ اس کے اثرات ایران پر طویل عرصے تک رہ سکتے ہیں۔
انہوں نے آخر میں کہا کہ اگر قطر کی ایل این جی تنصیبات پر دوبارہ حملہ ہوا تو امریکہ سخت قدم اٹھانے سے پیچھے نہیں ہٹے گا۔
