سیو آور پاک
خطے میں تیزی سے بدلتی صورتحال کے پیش نظر وزیراعظم شہباز شریف کی سربراہی میں ایک اہم اعلیٰ سطحی اجلاس منعقد ہوا، جس میں سینئر وفاقی وزراء اور اعلیٰ حکام نے شرکت کی۔
اجلاس کے دوران ایران اور امریکا کے درمیان جنگ بندی میں توسیع کے بعد پیدا ہونے والی صورتحال پر تفصیل سے غور کیا گیا۔ ذرائع کے مطابق اس بات پر اتفاق کیا گیا کہ مذاکرات کے دوسرے مرحلے کو یقینی بنانے کے لیے پاکستان اپنی سفارتی کوششیں مسلسل جاری رکھے گا۔
ذرائع کا کہنا ہے کہ اس سلسلے میں پاکستانی قیادت آج بھی ایرانی قیادت سے رابطہ کرے گی تاکہ بات چیت کا عمل آگے بڑھایا جا سکے اور خطے میں استحکام کو فروغ دیا جا سکے۔
اجلاس میں پاکستان نے امریکی صدر کی جانب سے جنگ بندی میں توسیع کے اعلان کو مثبت قدم قرار دیتے ہوئے اس کا خیر مقدم کیا۔ شرکاء کا کہنا تھا کہ ایسے اقدامات خطے میں کشیدگی کم کرنے اور امن قائم رکھنے میں مددگار ثابت ہو سکتے ہیں۔
