سیو آور پاک
اسلام آباد: ایران اور امریکا کے درمیان ہونے والی جنگ بندی کے پیچھے پاکستان کی اہم کوششوں کی تفصیلات سامنے آ گئی ہیں، جن سے پتہ چلتا ہے کہ پاکستان نے کس طرح ایک بڑے خطرے کو ٹالنے میں کلیدی کردار ادا کیا۔
ذرائع کے مطابق یہ جنگ بندی کسی اتفاق کا نتیجہ نہیں تھی بلکہ پاکستان کی سول اور عسکری قیادت کی ایک منظم اور خفیہ سفارتی کوشش کا حصہ تھی، جس کے ذریعے دنیا کو ایک بڑی تباہ کن جنگ سے بچایا گیا۔
حکومتی ذرائع کا کہنا ہے کہ یہ مشن نہایت حساس اور مشکل تھا۔ گزشتہ دن اور رات پاکستان کی قیادت کے لیے انتہائی دباؤ اور اہمیت کے حامل تھے، کیونکہ ایک طرف ممکنہ جنگ کا خطرہ بڑھ رہا تھا جبکہ دوسری جانب پاکستان تہران اور واشنگٹن کے درمیان رابطے کا ذریعہ بنا ہوا تھا۔
اس پورے عمل کو تین اہم مراحل میں مکمل کیا گیا، جن میں ہر قدم انتہائی احتیاط اور رازداری کے ساتھ اٹھایا گیا۔
پہلا مرحلہ منگل کی صبح شروع ہوا اور تقریباً صبح 10 بجے تک جاری رہا، جس دوران امریکا، ایران، سعودی عرب اور دیگر خلیجی ممالک سے ابتدائی رابطے کیے گئے۔
دوسرا مرحلہ شام 6 بجے سے شروع ہو کر رات 9:30 بجے تک جاری رہا۔ اس دوران چین اور روس کی قیادت سے بھی متعدد بار رابطہ کیا گیا تاکہ انہیں اس عمل میں شامل اور مطمئن رکھا جا سکے۔
تیسرا اور سب سے اہم مرحلہ رات 11 بج کر 45 منٹ پر شروع ہوا جو صبح 4 بجے تک مسلسل جاری رہا۔ اسی مرحلے میں دونوں ممالک کے درمیان جنگ بندی کے اہم نکات پر اتفاق رائے قائم ہوا۔
ذرائع کے مطابق ان تمام رابطوں میں وزیر اعظم شہباز شریف، وزیر خارجہ اسحاق ڈار اور چیف آف آرمی اسٹاف جنرل سید عاصم منیر براہ راست شریک تھے۔ اس کے ساتھ ساتھ وزارت خارجہ اور قومی سلامتی کے دیگر اداروں نے بھی پس پردہ اہم کردار ادا کیا۔
حکومتی ذرائع کا کہنا ہے کہ اس پورے عمل کو انتہائی ذمہ داری اور خاموشی کے ساتھ مکمل کیا گیا، اور آخرکار پاکستان کی کوششیں کامیاب رہیں جس کے نتیجے میں ایک بڑی جنگ کا خطرہ ٹل گیا۔
