سیو آور پاک
چیف آف نیول اسٹاف ایڈمرل نوید اشرف نے کہا ہے کہ پاک فضائیہ ایک جدید اور مضبوط فورس ہے، جو جدید ٹیکنالوجی سے لیس ہے اور کسی بھی چیلنج کا مقابلہ کرنے کی مکمل صلاحیت رکھتی ہے۔ انہوں نے یہ بھی واضح کیا کہ پاک بحریہ ملک کی سمندری سرحدوں کے دفاع میں اہم کردار ادا کر رہی ہے، جبکہ پاکستان ہر قسم کی جارحیت کا منہ توڑ جواب دینے کے لیے ہمیشہ تیار ہے۔
پی اے ایف اکیڈمی رسالپور میں GDP-152 اور دیگر کورسز کی گریجویشن پریڈ ایک شاندار انداز میں منعقد ہوئی، جس میں اعلیٰ عسکری قیادت نے شرکت کی۔ اس تقریب کے مہمان خصوصی چیف آف نیول اسٹاف ایڈمرل نوید اشرف تھے، جبکہ ایئر چیف مارشل ظہیر احمد بابر سدھو بھی اس موقع پر موجود تھے۔
تقریب کے دوران مہمان خصوصی نے پریڈ کا معائنہ کیا اور بہترین کارکردگی دکھانے والے کیڈٹس کو اعزازات سے نوازا۔ اس کے ساتھ ہی پاس آؤٹ ہونے والے کیڈٹس نے اپنے فرائض کی ادائیگی کا حلف بھی اٹھایا۔
خطاب کرتے ہوئے ایڈمرل نوید اشرف نے کیڈٹس کو مبارکباد دی اور کہا کہ معرکہ حق کے دوران پاک فضائیہ نے شاندار کارکردگی کا مظاہرہ کیا۔ انہوں نے مزید کہا کہ اصغر خان اکیڈمی سے فارغ التحصیل ہونے والے کیڈٹس ہمیشہ سے اپنی خدمات کے باعث نمایاں رہے ہیں۔
انہوں نے اس بات پر زور دیا کہ پاک فضائیہ نے گزشتہ سال مئی میں اپنی طاقت اور صلاحیتوں کو بھرپور طریقے سے دنیا کے سامنے پیش کیا، جبکہ سائبر اور الیکٹرانک وار فیئر کے میدان میں بھی اپنی مہارت ثابت کی۔
نیول چیف نے خطے کی صورتحال پر بات کرتے ہوئے کہا کہ ایران اور امریکا کے درمیان کشیدگی اور آبنائے ہرمز کی ممکنہ بندش نے عالمی سطح پر تیل کی سپلائی کو متاثر کیا ہے۔ انہوں نے کہا کہ قوم کے تعاون سے افواج پاکستان دہشت گردی کے خلاف کامیابی سے لڑ رہی ہیں اور ملک کے دفاع کو ہر حال میں یقینی بنایا جا رہا ہے۔
